Ushtria Mbretërore

Më 1 Shtator 1928, Shqipëria shpallet Monarki dhe Ahmet Zogu Mbret i Shqiptarëve.

Me vendosjen e sistemit të ri politik, Forcat e Armatosura u riorganizuan: komandant i Përgjithshëm ishte Mbreti Zog. Me ligjin e ri të organizimit, Forcat e Armatosura të Mbretërisë shqiptare ishin Ushtria Kombëtare dhe Xhandarmëria.
Forcat e Armatosura u ndanë në Forca Tokësore, Forca Detare dhe Forca Ajrore. Forcat Tokësore ishin forcat kryesore dhe përbëheshin nga: Garda Mbretërore, Shkollat Ushtarake, Arma e Këmbësorisë, Arma e Artilerisë, Arma e Xhenios, Roja Mbretërore e Kufirit, Inspektoratet e Mobilizimit, Drejtoritë dhe Zyrat e Rekrutimit, Trupi Shëndetësor, Trupi Veteriner dhe Trupi i Intendentëve. Forcat Detare dhe Ajrore nuk arritën të krijoheshin me kapacitetin e duhur dhe kishin mjete e personel të reduktuar.

Forca Detare përbëhej nga 4 anije dhe 4 motoskafë amerikanë prej druri të tipit "Elco", ndërsa Forca Ajrore përbëhej nga 5 avionë të tipit "Albatros - Fokker".

Mbreti Zog u përpoq të krijonte një ushtri moderne, sipas standardeve perëndimore. Për këtë qëllim u përshtatën në shqip ligje dhe rregullore ushtarake të marra në Austri dhe Itali, si dhe iu kushtua rëndësi shkollimit ushtarak duke hapur edhe shkollat ushtarake.

Një numër i konsiderueshëm studentësh u dërguan në akademitë më të mira ushtarake të Italisë.

Në vitin 1939 Ushtria Mbretërore përbëhej nga 780 oficerë, 1.620 nënoficerë dhe 13.200 ushtarë.